كيف أذاكر
ملاحظة هامة
طرق المذاكرة المذكورة هنا هى طرق عامة تصلح لأى مادة ولأى فرقة ولأى كلية
وأنصح القارىء بقراءة الصفحة كلها لاستيعاب الطرق المختلفة
أفضل طرق للمذاكرة : للمذاكرة طريقتان :1- طريقة رئيسية ( طريقة الألوان والمسح الشامل ) .2- طريقتان ابتكاريتان تكميليتان ( الكومودينو + جسر الحمار )وهذه الطرق ليست بديلة لبعضها البعض ولكنها مكملة لبعضها البعض بهدف السيطرة الكاملة على المعلومات بمجهود أقل ووقت أيسر . 1- المسح
الشامل 1 : عن طريق قراءة المحاضرة بالكامل كقراءة الجرنال بدون تركيز أو
محاولة للحفظ – يعنى مثلا المحاضرة المكونة من 30 صفحة تقرأ فى 10 دقائق .
والغرض من هذا الجزء من الطريقة احداث ألفة بين القارىء والأوراق وهذا فى
غاية الأهمية من الناحية النفسية .2- مرحلة
التلوين : عن طريق تلوين العناوين الرئيسية والفرعية وتحت الفرعية
والكلمات الهامة فى بعض الفقرات . وهذه المرحلة تعرف الطالب بالإطار العام
للمحاضرة وتعطية شىء من السيطرة على المحاضرة وفى نفس الوقت تضاعف الألفة
بينه وبين الأوراق . وهذه المرحلة تستغرق حوالى 10 دقائق أيضا .3- مرحلة
الإستيعاب السريع : فى هذه المرحلة يقرأ الطالب المحاضرة ببطء نسبيا ولكن
ليس معنى هذا أن يقرأ الصفحة فى ساعة أو حتى نصف ساعة ولكن تقريبا 4- 7
دقائق تقريبا للصفحة ( بعيدا عن السرحان أو تخيل ماوراء السطور ولو وصل
الأمر الى تأجيل فهم بعض النقاط حيث أنه بالتقدم فى المنهج يفك غموض
الأجزاء القديمة المجملة ) .4- المسح الشامل 2 : مثل الخطوة رقم 1 تماما .5- بعد ذلك تترك المحاضرة تماما . وبعد 4- 5 أيام تعمل مسح سريع مرة أخرى فى 10 دقائق وتكرره كل عدة أيام
ملاحظات : مدمنو الطريقة الكلاسيكية المستخدمة فى الثانوية العامة وهى طريقة " الحفظ التام أو الموت الزؤام " ومذاكرة الصفحة فى ساعة وعدم الإنتقال من الصفحة إلا بعد القضاء عليها حفظا - يظنون عدم
جدوى طريقه التلوين والمسح الشامل ولكن يقول علماء النفس أن المعلومات
التى يحصلها الإنسان ينساها خلال 10 أيام تقريبا حسب منحنى النسيان وهذا
طبيعى عند كل البشر مهما كان مستوى حفظك لهذه المحاضرة .ولكن
طريقة التلوين والمسح الشامل توفر بقليل من المجهود والوقت الإحتفاظ
بالمعلومة لوقت طويل جدا وتجديدها من خلال المسح الشامل وقد أثبتت
الإحصائيات أن الطلاب والطالبات الذين يستعملون هذه الطريقة لا يقلون عن
تقدير ممتاز خصوصا مع الكم الهائل من المعلومات الموجودة فى المحاضرات
والمطلوب قراءتها كلها ليلة الإمتحان .وحتى تغير طريقتك التقليدية الى هذه الطريقة لابد أن تتغير تدريجيا بتجربتها وتكرر وتصبر ولا تيأس حتى تتعود عليها وتصير أسلوب مذاكرة لديك . طريقة الكومودينو : تخصص هذه الطريقة التكميلية الإبتكارية للسيطرة على الرسومات ( مثل دورات الحياة فى علم الطفيليات ، وعلم الحيوان ورسومات النبات والعقاقير ورسومات التحليل الآلى والعقاقير التطبيقى مثل ال UV, IR ) وصور الأجهزة ( مثل أجهزة الصيدلانيات والصيدلة الصناعية والكروماتوجرافى فى العقاقير التطبيقى ) والصيغ الجزيئية للمركبات الكيميائية ( مثل الكيمياء العضوية والحيوية والفيتو والكيمياء الصيدلية ... الخ ) تتلخص هذه الطريقة فى إعداد مجموعة من الأوراق البيضاء ثم نرسم محتويات كل محاضرة من الصيغ الجزيئية للمركبات (
مثلا ) فى الورق ونضع كود لكل مركب وفى آخر ورقة نكتب مفتاح الحل ونضع هذا
الورق على الكومودينو . وعند النوم بعد الإستعداد للنوم والإستلقاء فى وضع
النوم ننظر نظرة عابرة فى الأوراق ونحاول التعرف على الصور ثم نراجع
تخميننا بمفتاح الإجابة فى الورقة الأخيرة ثم بعد ذلك نروح فى ثبات عميق .
ونكرر ذلك يوميا أو يوم بعد يوم . بعد عدة مرات تجد نفسك قد حفظت تلك
الرسومات بشكل غير عادى .ملحوظة
: تعتمد هذه الطريقة على وقت ماقبل النوم حيث تكون الذاكرة والإستيعاب
أعلى مايمكن ولو لم يتم بذل مجهود كبير فى التركيز كما يقول علماء النفس . طريقة جسر الحمار : تعالج هذه الطريقة ضعف حفظ العناصر الكثيرة عندما يطلب استظهارها يعنى مثلا ما هى العوامل التى تؤثر على ظاهرة معينة ؟ وتكون الإجابة 25 نقطة – كيف
تذكرها دون أن تغفل نقطة واحدة . ( مثل مادة الصيدلانيات والصحة العامة
والصيدلة الصناعية والميكروبيولوجى والمعلومات الدوائية والعلاج الدوائى
والفارماكولوجى والسموم ) تتلخص
هذه الطريقة فى تحديد كلمات المفاتيح ( أى الكلمات المميزة ) فى كل عنصر .
ثم أخذ الحرف الأول من كل كلمة من هذه الكلمات المفاتيح وتكوين جسر الحمار
( كلمة مميزة ذات معنى فكاهى أو مرتبطة بشىء مميز ) حيث يشير كل حرف لكلمة
مفتاح وكل كلمة مفتاح توصل الى العنصر بكاملة . 
نصائح ثمينة جدا وطرق مبتكرة حديثة مبنيه على علم النفس كيف تذاكر بشكل عام وما هى أفضل الطرق لمذاكرة العقاقير بشكل خاص ؟ الأخوة والأخوات / طلبة وطالبات الفرقة الأولى :
عموما المذاكرة 3 أنواع
1- مذاكرة ضعيفة أوى يادوبك عشان النجاح ولكن غالبا بدون فهم
2- مذاكرة وسط تبقى فاهم فهم شمولى وتنجح بسهولة باذن الله
3- مذاكرة ممتاذه بفهم عميق تمهد لتكوين مخترع أو عالم
وبنظرة عابرة على ظروف الكلية وطبيعة نظام الترم اللاهثة يبقى مفيش أدامنا الا الطريقة الوسط " خير الأمور الوسط "
وطريقة الوسط تختلف من مادة الى أخرى حسب طبيعة المادة وحسب شكل الامتحان وحسب شخصية وأسلوب أستاذ المادة
أنا مش هستخدم كلام هلامى أجوف ميوصلش لفوايد محددة
خلينا نتكلم تحديدا فى هذه المداخلة عن طريقة مذاكرة العقاقير للفرقة الأولى صيدلة – الترم الثانى اللى احنا فيه دلوقتى
أول نقطة لازم أحفظ ترتيب المنهج
طبعا انته دلوقتى وكل زمايلك هتستغربو
ايه اللى دخل ترتيب المنهج فى الامتحان ؟
شوف
فيه أسئلة اسمها أسئلة التجميع ممكن تيجى بشكل مباشر يعنى short notes مثلا
Q: u have studied seeds , select
those containing alkaloids & mention their botanical origin , other
constituents ,chemical test & medicinal use & draw the powdered
elements
Q: for antirheumatic seeds & fruits u studied , compare & contrast between their morphology , histology , chemical test
Q: compare with drawings between the different histological types of epidermal cells of seeds u have studied
وممكن تيجى بشكل غير مباشر فى أسئلة complete كالآتى :
All umbelliferous fruits contains volatile oil except……………….وممكن تيجى بشكل غير مباشر فى أسئلة MCQ كالآتى :Choose the correct answer :The epidermis of these seeds are of the same type except:a) linseedb) nux vomicac) black mustardd) white mustard
وأمثلة تانية كتييييييييييييييييييييييييييييييييييييييييييير
لو تاخد بالك هتلاقى فى كل
الأسئلة دى لو منتش حافظ المنهج بالترتيب أكيد هتنسى جزء كبير من الاجابة
وتجيب حته من هنا وحته من هنا ولازم هتنسى
فمهم جداااااااااااااااااااااااا جدااااااااااااااااااااااااا حفظ ترتيب المنهج
ودى مسألة مش صعبة هى بس عاوزة تصفح كتير لأوراق المحاضرات كل ماتبدأ تذاكر مرة ف مرة هتلاقى نفسك عرفت المنهج بالترتيب
دى كانت أول نقطة وبتحل مشاكل كتير
طب أذاكر ازاى ؟
هل أقعد أقرا الصفحة ف ساعة وأكتب اللى أقراه وأرسم ؟ واللا أعمل ايه ؟
لو عملت كده مش هتخلص أى منهج ولا حته نص منهج وعلى فكرة هتنسى اللى قريته تانى زى ماعلم النفس بيقول
أمال نعمل ايه؟
لازم نعرف حاجه مهمة جدا أول مانبدأ نذاكر موضوع لأول مرة سواء فى مذكرة أو فى محاضرة مصورة
بيكون فيه نوع من الغربة بينك
وبين الموضوع وبتلاقى الورق نضيف مفيهش خط قلم ( طبعا يتفهم من هذا الكلام
ان اللى بيحضرو المحاضرات حتى لو مفهموش حاجه خالص كسبو أنهم كسرو حاجز
الرهبة للموضوع ودى فى حد ذاتها قيمة كبيرة جدا بتدى ثقة فى النفس ومقدرة
على الأقدام انك تبدأ فورا فى القرايه وخصوصا لو كان الوقت بين شرح
المحاضرة والمذاكرة قليل وعشان كده بنصح كل طالب وطالبة يكتب فى المحاضرة
اللى الدكتور بيقولة ولو كلام مش كامل - اذا كان الدكتور بيشرح بسرعة –
وأول ما الطالب يروح مباشرة بعد الغدا والصلاه والشاى وخلافه أول حاجه
يعملها يقرا الشخابيط اللى كتبها ورا الدكتور
حقيقى هتفرق معاك كتير جدا وانت بتذاكر المحاضرة بعد كده )
طيب اللى محضرش المحاضرة وتناه واقف تحت الكوبرى أو فى الكافيتريا يعمل ايه ؟
أول مانستلم أوراق المحاضرة نكسر حاجز الرهبه الأول
ازاى ؟
نقرا الموضوع قراية جرايد
ده بيسموه فى علم النفس طريقة المسح الشامل
وبعد قراية الجرايد نعمل ايه ؟
نمسك القلم ونخطط تحت العناصر الرئيسية ( قلم عادى أو ألوان فوسفوريه ) وبلون تانى للعناصر الفرعيه
وبعد كده نقراها تانى قراية جرنال مرتين
وبعد كده نسيبها خالص
ليه ؟
علم
النفس بيقول أن منحنى الذاكرة يوضح أنه لا بد من حدوث نسيان عند الأنسان
الطبيعى بعد تحصيل المعلومات خلال 10 ساعات تقريبا من تخزين المعلومات
يبقى هتذاكر باتقان أو قراية جرنال المحصلة واحده
هتنسى يعنى هتنسى
وبعدين ؟
تانى يوم قبل ميعاد النوم تقراها تانى قراية جرنال – خللى بالك بأه هنا هتلاقى فرق كبيييييييييييير جدا
الحاجه اللى بتتقرى فى الوقت ده بتتنقش فى الذاكرة ومبتتنسيش خالص باذن الله
وممكن يوم الجمعة أوم يوم أجازتك تقراها تانى بنفس الطريقه
ساعتها خلاص
بردة ده كله كلام عام ينفع فى العقاقير وغيرها
احنا عاوزين طرق مميزه تسهل مذاكرة العقاقير
طيب خليك معايا
مهم جداااااااااااااااا جداااااااااااااااااا جدااااااااااااااااااااا الرسومات
طبعا منطقية عرض المنهج فى المحاضرة أو المذكرة تتطلب وضع الرسومات مع بقية النظرى
احنا
بأه نعمل عملية منتجه ونطلع الرسومات لوحدها فى مجموعة أوراق ونشيل
البيانات اللى عليها ونحط أسهم على الرسومات تشير للحاجات المهمة مثل ال key elements ونكتب أدامها أرقام وتكون فيه ورقه تانيه فى آخر الورق فيها دلالات الأرقام ( يعنى مفتاح الاجابة يعنى رقم 1 هو الcrystal sheath مثلا
) وأثناء منته نايم على ضهرك على السرير قبل النوم بص فى الرسومات طبعا مش
مكتوب أى بيانات ولا حتى اسم النبات وحاول تشغل الذاكرة وتفكر شوية ياترى
البودر أو القطاع ده بتاع نبات ايه والسهم اللى ف رقم 3 بيشاور على ايه ؟
ولما يغلب حمارك روح لمفتاح الاجابة فلى ضهر الورق واعرفه
وكرر الشغلانه دى يوميا قبل النوم بعد ماتتوضى وتجهز للنوم
عارف لو عملتها مش هتقل عن امتياز باذن الله بس ابقى ادعيلى
أخوتى وأخواتى / طلبة وطالبات الفرقة الإعدادى
السلام عليكم
هنتكلم سوا عن طرق تسهل المذاكرة لمواد اعدادى بداية من الترم الثانى
قبل منتكلم عن المواد تفصيلا نتكلم عن طرق عامة للمذاكرة
طبعا
طريقة المذاكرة تختلف من طالب لآخر حسب استعداده النفسى وظروفه البدنيه
والنفسيه والأسرية يعنى العوامل اللى بتحدد مدى توفير جو هادىء ومناسب
وتخصيص عدد ساعات طويلة للمذاكرة وامكانية الترفيه القصير والعوده وهكذا
وعدم تحمل مسئوليات أخرى من الأسرة أو من غيرها وقت المذاكرة وجو التوتر...
الخ
وعدم انشغال الذهن بأمور أخرى برة المذاكرة وعدم المذاكرة أول بأول يعنى أد ايه متراكم بدون مذاكرة ..الخ
ومنها التشويش كوجود كاسيت جنبك أو ناس صوتها عالى ... أو ناس بتذاكر فى مجموعة أو ناس متغربين اما ساكنين فى طنطا أو بيسافرو يوميا
المتغربين
وساكنين فى طنطا بيقابلهم مشاكل بتاخد من وقتهم زى تنظيف المكان وتوضيب
الأكل والطبيخ فى بعض الأحيان والإحساس بالغربة من وقت لآخر مما يسبب
السرحان
واللى
بيسافرو يوميا بيلاقو الأكل مستنيهم ولكن بيبقو تعبانين من كتر السفر (
يعنى محتاجين نوم ) ده غير الوقت اللى بيضيع فى المواصلات
وطبعا كل طالب وطالبة بيختار الأفضل له حسب استعداده النفسى والمادى وظروفه الخاصه
كلامنا هنا هيبدأ من لحظة جلوسك على كرسى المذاكرة
أذاكر ازاى ؟
بس أنا عاوز أتكلم عن حاجه مهمه أوى قبل مقول طرق المذاكرة
( 1 ) توفير الوقت
( 2 ) لازم أحدد هذاكر منين
أولا توفير الوقت :
كلنا
عارفين أن الكليه جد مش زى أى كلية تانيه يعنى لازم شغل وتعب فنحاول بقدر
الإمكان منضيعش وقتنا أنا بقول الكلام ده وانتو مبتحسوش بيه الا عند
النتيجه لما تلاقى زميلك نلجح وانت شايل أو مدبلر – لا قدر الله – بس مش
معنى كده انى أتكتم واتحبس وأتخنق فى معسكر مغلق بدون أى ترفيه لمدة خمس
سنوات
أنا
مقولتش كده لازم تكون صداقات ويكون لك أصحاب ومفيش مانع من الرحلات
المباحة وتنمية بعض الهوايات وممارسة بعض النشاطات والسمر مع الأصدقاء وايه
المانع انى أكون مشترك فى فريق الكلية بتاع كرة القدم أو الكرة الطائرة أو
السلة أو الإسكواش أو اللجان المختلفة المباحة
كل ده جميل ولا يتعارض مع النجاح بتفوق فى الكلية ولكن احنا مش بنعرف نحسبها صح
بمعنى اننا بننسى نفسنا مبنعرفش نوسطن الأمور .. معندناش وسط .. يامقفلين خاص يافاتحينها ع البحرى
لو اتعملت الأنشطة دى بتوسط وبجرعات قليلة معقولة هتلاقى نفسيتك اتجددت ونشاطك زاد وبقيت أفضل وطاقتك فى المذاكرة هتزيد
بس فيه حاجه مهمة جدااااااااااااا
فيه بعض الواجبات الكتابية مثل كراسات العملى
ليه
نسيبها تتراكم علينا طول الترم ونقعد نرغى فى السكاشن فى كلام فاضى ونتزنق
آخر الترم ونضيع فيها يوم كامل أو يومين والوقت فى آخر الترم بيبقى قاتل
كل ثانيه ليها تمن ........ صح واللا لأ ؟
ايه المانع إنى أكمل كراستى سكشن بسكشن فى قلب المعمل يبقى شلت من على دماغى حمل كبير الحاجة
التانيه : أنا عارف انى لما هروح البيت هصلى كل الأوقات أو غالبا الظهر
والعصر طيب ليه ماصليهمش فى وقتهم فى الكليه منها آخد ثواب الصلاة على
وقتها ومنها أوفر الوقت ده فى البيت وأخليه للنوم أو المذاكرة ؟
عرفتو أد ايه انتو بتضيعو وقت كتير ؟ وترجعو تقولو احنا اتزنقنا والكلية صعبة ومفيش وقت للمذاكرة .......الخ
ثانيا : أذاكر منين ؟
بمعنى ايه المصدر اللى أذاكر منه ؟
هل أذاكر من المذكرة مباشرة ؟ واللا من الورق اللى زملائى بيبيضوه ؟ واللا من الإتنين ؟ واللا من ورق السنة اللى فاتت ؟
أولل حاجة لازم أحضر المحاضرة
أنا
عارف ان فيه ناس منكو دلوقتى هترد بسرعة وتقول : مبنفهمش حاجه .. الدكتور
بيقول بسرعة مبنلحقش نتابع ولا نكتب .. عشان كده قلتها أحسن .. أنا أفرفش
نفسى برة المدرج وأتكلم مع زميلتى وآكل كيس واللا اتنين بيك رولز واللا
كرانشى واللا مورو وأشرب كانز.. بعدها تكون المحاضرة خلصت ولما أصحابنا
يبقو يخلصو كتابتها نبقى نصورها منهم ........... صح ياشباب بتقولو كده
واللا لأ ؟
هرد عليكو وأقولكو فيه حاجه أحسن من كده
اللى بيحضر المحاضرة حتى لو مفهمش حاجه غير اللى محضرش خالص .. ليه ؟
أول
حاجه بياخد معاه المذكرة وبيخطط على العناوين اللى الدكتور بيتكلم فيها
وده مهم جدا من الناحية النفسية لأنه بيشيل حاجز الرهبة مع الموضوع
تانى
حاجه بيسمع طريق نطق الدكتور للمصطلحات العلمية مثل أسماء النباتات مثلا
حتى لو ملزقتش فى مخه يبقى عدت عليه قبل كده ..... تفرق كتير
ثالث حاجه ياريت اللى يحضر ياخد معاه ورقتين فاضيين يحاول يكتب ورا الدكتور ولو حتى شوية شخابيط حتى لو ملحقش يكتب أنا عارف أن موهبة كتابة المحاضرة مش عند كل الناس لأنها محتاجة شىء اسمة توافق عضلى عصبى neuromuscular coordination وده مش موجود عند كل الناس
ولكن
الشخابيط اللى بتكتبها ورا الدكتور فى منتهى الأهميه مش هتحس بكده الا بعد
متروح البيت يوم المحاضرة وتحاول تقرا الشخابيط وتفتكر .. ساعتها هتعرف
قيمة الشخابيط دى وياسلام لو كتبت حاجة تضحك الدكتور قالها أو موقف لذيذ
حصل أثناء الشرح ....... عمرك ماهتنساه أبد ولا المعلومات اللى ارتبطت بيها
دى كانت نقطة حضور المحاضرة
بعد
كده لما حضرت وعرفت الكتور اتكلم فى ايه أقارن المذكرة بالورق بتاع السنة
اللى فات بالورق اللى الزملاء مبيضينة بس مش عاوزين مقارنه موسوسه
......... يعنى مش عاوزين رسالة دكتوراه ... عاوزين الإنجاز والقرار السريع
عشان نبدأ
بس
نخللى بالنا أن دايما أو غالبا زملائنا بيكتبو حاجات غلط فى الورق بتاعهم
....... دورنا فى الوقت ده نصحح الخطأ من المذكرة أو من أى مصدر آخر أو
أسأل الدكتور مباشرة
وده بيفسر ليه فى بعض الأحيان ليه اللى بيبيض محاضرات للدفعه بيشيل المادة واللى بيقرو منه بيجيبو تقدير.
دلوقتى احنا حددنا المصدر
ونبدأ الكلام عن طريقة المذاكرة
نتكلم دلوقتى عن كيفية مذاكرة الأورجانك
أول حاجة لازم أعمل كراسة مخصوص للميكانزمات وأعملها بإيدى مش أصورها من غيرى
طيب أعملها ازاى ؟
أولا كل ميكانزم يتعمل فى صفحة مستقلة مهما كان طويل أو قصير منعا للتداخل
فى أول الصفحة نكتب اسم الميكانزم بلون مميز
تحتها على طول نكتب ملخص الميكانزم بمعنى
starting materials --------------------------------------------------------> products
ونكتب على السهم عوامل وظروف التفاعل
وبعد كده نشد خط عشان نفصل الخلاصة الموجزة السابقة عن التفصيل الآتى
بعد الخط نبدأ فى كتابة الميكانزم بالتفصيل ونحاول يخلص فى صفحة واحدة مهما كان طويل
والصفحة اللى بعدها الميكانزم التالى وهكذا
وبعد منخلص الكراسة نذاكرها ازاى؟
عندنا حوالى 30 ميكانزم ممكن يدخلو كلهم فى بعض وجايين جايين فى الإمتحان نستخدم معاهم طريقة الكومودينو كالآتى:
بعد
مانستعد للنوم ونتوضى كراسة الميكانزمات تكون على الكومودينو اللى جنب
السرير اللى بننام عليه نستلقى على ضهرنا وننور الأباجورة أو مصدر اضاءه
مناسب ونفتح الكراسة ونتصفح الميكانزمات واحد واحد تصفح جرنال الحكاية دى
ممكن تاخد أول مرة 20 دقيقة وبعد كده نقول أذكار النوم ونروح فى سابع نومة .
طبعا هتقولو كده مفيش تركيز ولا ورقة ولا قلم
بس علم النفس بيقول غير كده المعلومة اللى بتتقرى قبل النوم بتثبت بشكل غير عادى وبعدين متنسوش فيه عامل مهم اللى هو ال hand memory انتو نسيتو ان انتو اللى محضرين الكراسة دى بنفسكو
وبعدين هوه الموضوع انتهى على كده ؟
لسة...
احنا بنكرر الحكاية دى يوميا يعنى عشر دقايق قبل النوم يوميا من غير تضييع
وقت ولا تمقيق عينين ولا تعب هتلاقى نفسك عرفت مكان كل ميكانزم فى الكراسة
وبدأت تعرف شوية تفاصيل
بعد كده ننتقل لمرحلة أعلى level 2 كالآتى :
نصور الكراسة فى ماكينة التصوير ونجيب corrector ونمسح البيانات اللى على كل الميكانزمات بداية من اسم الميكانزم الى أسماء الintermediates ………etc ونرجع نصورها تانى بعد عملية ال corrector وبعد كده ننتقل لمرحلة اختبار ذاتى يوميا بمعنى نبص فى الورق اللى من غير بيانات ونحاول نفتكر اسم الميكانزم وأسامى المركبات والintermediates طبعا أكيد هنغلط وممكن منفتكرش على طول نرجع للكراسة بتاعتنا ونعرف الإجابة الصحيحة وهكذاالتكرار اليومى لمدة عشر دقايق بس وقبل النوم بهذه الطريقة سبب كافى للحصول على تقدير امتياز بإذن الله.
ماشى ياشباب؟
أنا عارف انكو هتقولولى : وهى الorganic ميكانزمات بس ؟
معاكو حق بس مفيش شك انها جزء كبير وبييجى فى الإمتحان لامحالة ومضمون بإذن الله .
** لكن فيه حاجه مهمه جداااااااااا من غيرها مش هنعرف نحل أى حاجه
تفتكرو هيه ايه ؟
أكيد عرفتوها
Nomenclature
صــــــــــــــــــــــــــــح؟
أحيانا بتيجى التفاعلات من غير رسم الstructure والمركب يتكتب الnomenclature بتاعه ويحط على السهم مواد التفاعل أو ظروفه ويطلب منك الناتج طبعا لو منتش عارف ال nomenclatureمش هتعرف ترسمه وبالتالى مش هتعرف الناتج حتى لو مذاكر
يبقى لازم نعرف ال nomenclature كويس أوى ومنستهترش بيها ونعرف كل كبيرة وصغيرة فيها
طب نبقى شاطرين فى ال nomenclature ازاى ؟
بصراحة لقيت كتاب فى المكتبة ممتاز فى هذا الموضوع اسمه
organic chemistry (Morrison & Boyd)
بيشرح التسميه بنظام IUPAC(international union of pure & applied chemistry )
توجد
منه نسخ كتير جدااااااااا فى مكتبة الكلية وأسلوبه رائع مناسب
جداااااااااا لمستوى الطالب أنا شفت الطبعة السادسة بتاعته موضوع ال nomenclature موجود من ص 87 الى ص 92 ياريت ترجعوله ولو وقفت معاكو أى نقطه تعالو اسألو فيها نوضحها انشاء الله .
** أنا عارف ان الstereochemistry تقيلة
عليكو حبتين لأنها محتاجة شوية تخيل عموما فيه كتاب فى المكتبه رائع وبسيط
جدااااا زى ملخصات الكتب الخارجية بتاعة ثانوى بس مش فاكر اسمه دلوقتى
انشاء الله أقوله لما أفتكره .
** اتهيألى دلوقتى بقيت الorganic سهلة جدااااااا والنجاح بقى قريب انشاء الله .
** انت بس تاخد بالك فى العملى وتعمل اسكيم كويس وتركز وتحاول تاخد الميت درجه دول لأنهم مضمونين أوى وبينفعوك جامد
** مش هيبقى فاضل غير الشفوى : طبعا الشفوى دايما قسمة ونصيب
بس
فيه حاجات حسن التصرف بيلعب فيها دور كبير يعنى مثلا تروح الإمتحان تكون
مصلى الفجر وقايل الأذكار ولابس كويس وغاسل وشك بالميه والصابون وحاطط
بارفان ( الولاد بس طبعا ) ومسرح شعرك ومتدخلش مع الشطار خصوصا لو منتش
مذاكر كويس .
طيب لو عملت ده كله والدكتور سألك فى حته انته متعرفهاش أو منتش مذاكرها كويس تعمل ايه؟
هنا حسن التصرف مهم جدااااااااااا وبيلعب دور كبير
ازاى ؟
تحاول
تسحب بساط الكلام لموضوع انت مذاكره كويس بأسلوب كويس من غير متحسس
الدكتور انك بتغير الموضوع أو بتهرب من السؤال واوعى تقول معرفش الا اذا
الدكتور زنقك فى خانة اليك وركز معاك أوى ساعتها قول معرفش بس أعرف كذا
وكذا وكذا .. يعنى حاول تفهمه انك عارف حاجات كتير ( بس خللى بالك وانت
بتعمل كده انك متكذبش يعنى استخدم أسلوب التورية عشان ده أكتر وقت انت
محتاج فيه ربنا )
** اتهيالى دلوقتى اديتكم كل اللى عندى فيما يتعلق بمذاكرة ال organic
أرحب بالمزيد من الأسئلة والإستفسارات
مع أرق تمنياتى للجميع بالتوفيق والنجاح
الإخوة والأخوات / طلبة وطالبات الفرقة الثانية :السلام عليكمالفيتو – على عكس مايعتقد كثير من الطلبة – مادة سهلة ولذيذة والتقدير فيها مضمونهتسألونى إزاى ؟أولا : تتجمع كل ال ( structures ) فى ورق خاص ويذاكر بطريقة الكومودينوثانيا : يتجمع كل ال ( isolation of alkaloids ) على شكل ( flow sheet ) ويتذاكر كومودينو مع التركيز على فكرة الفصل فى كل خطوة .وبقية المنهج تلوين ومسح شامل . مع أرق تمنياتى للجميع بالتوفيق والنجاح
Hitskin.com
موضوع: أفضل طرق للمذاكرة 
الإثنين 25 أبريل 2011, 12:56 pm
